Инсон саломатлигини асраш барчамизнинг биринчи галдаги вазифамизга айланмоғи керак.

Инсон саломатлигини асраш барчамизнинг биринчи галдаги вазифамизга айланмоғи керак.

Барчамизга маълумки, мамлакатимизда коронавирус пандемияси қайд этилган кундан эътиборан, карантин ҳолати жорий этилди.
Кўпчилик кишилар ушбу карантин даврида эълон қилинган барча талаб-қоидаларга амал қилган ҳолда ўтказишга ҳаракат қилишмоқда. Лекин, карантинга қарамай, аҳоли ўртасида кўнглини кенг қилиб, тиббий ниқоб тақмасдан бемалолхўжа юрганлар ҳам учраб турибди. Aхир, гап инсон саломатлиги ҳақида кетаётган бир пайтда, бу каби кишиларга қандай чора кўриш мумкин…


Куни кеча Шаҳрисабз туман фавқулодда вазиятлар бўлими масъул ходимлари туман санитария-эпидемиологик осойишталик маркази ходимлари билан биргаликда, туманнинг аҳолиси зич бўлган «Мираки» маҳалла фуқаролар йиғинида дезинфекция ишларини амалга оширишди. У ердаги кўчалар, озиқ-овқат савдо дўконлари ва бошқа хизмат кўрсатиш корхоналари обдон дезинфекция қилинди.


— Дезинфекция ишлари вирус мавжуд жойлар ва ерларда ўз таъсири ўтказиб, уларнинг аҳолига бўлган хавф даражасини камайтиради, — дейди туман фавқулодда вазиятлар бўлими ходими, катта лейтенант Спартак Нажимов. — Лекин, аҳолининг ўзи карантин талаб-қоидаларига бирдек амал қилмаса, касаллик тарқалишини олдини олишнинг имкони бўлмайди. Биз имкониятимиздан келиб чиққан ҳолда жойларда, аҳоли тўпланадиган ерларда дезинфекция ишларини мунтазам равишда амалга ошириб келмоқдамиз. Лекин, шунга қарамай, аҳоли орасида карантин қоидаларига амал қилмаётганлар жуда кўплаб учрамоқда. Уларнинг аксарияти ниқобни юзга эмас, балки иягига тақиб олганликлари, ижтимоий масофа сақламаслик ва яна 3 кишидан ортиқ бўлган кишилар бир ерда тўпланиб олганликлари каби ҳолатлар учрамоқда.

Aзиз фуқаролар!

Карантин муддати узайтирилиши ёки камайиши бу сиз-у бизнинг хатти-ҳаракатларимизга бирдек боғлиқ жараёндир. Бу касаллик кишидан кишига юқиш хавфи жуда юқори эканлигини билсакда, гоҳида ижтимоий масофа сақлашни унутиб қуямиз. Aгарда ҳаммамиз муддатли карантинни барча талаб-қоидаларига риоя этиб ўтказа олсак, албатта, одатдаги турмуш тарзимиз тикланишига барчамиз ўз ҳиссамизни қўшган бўламиз.

Шаҳрисабз тумани ҳокимлиги ахборот хизмати